老字號“藝苑”

白話廣州

  最近，一則市二宮藝苑歌舞廳拆除嘅消息，引起好多廣州老街坊嘅關注。

  藝苑歌舞廳始創于上世紀80年代，算得上系廣州一間老字號歌舞廳。

  上世紀80年代初期，市民嘅夜生活開始興起跳交誼舞，因應呢種需求，好多地方都開咗舞廳，其中包括市一宮、市二宮、市三宮、青宮等“宮”字單位。

  市二宮地處河南，喺嗰個年代，相對于喺正中心區嘅另外三“宮”嚟講，地頭比較偏。但偏有偏嘅優勢，就系地方多，所以市二宮將一棟原先兩層高嘅大樓改成舞廳，面積超過一千平方，成為全市最大嘅舞廳。

  喺建筑方面，“藝苑”仲有一個特色，就系門口嘅燈飾設計，日頭睇冇乜特別，但到晚黑一開燈就似一只孔雀喺度開屏。

  藝苑歌舞廳雖然個名有個“歌”字，但主要系跳舞，系廣州最出名嘅舞廳之一，喺嗰度跳舞嘅人當中不乏“舞”林高手，其中有一男一女（兩公婆）仲攞過全國跳舞十項全能季軍。

  隨住時代嘅變化、需求嘅變化，廣州呢類舞廳宜家已經執得七七八八，“藝苑”屬為數唔多可以捱到今時今日嘅喇，所幸嘅系，呢次拆除只系重新改建，亦即系講，“藝苑”以后可以舞照跳，“孔雀”晚黑照開屏。

  ◎阿六 律師